股票市場的永恆數學

尋日睇完牙醫, 要遲幾日先出到片, 我個人唔算老, 但比較Old School, 所以呢幾日都會同大家睇下一D「廢老」既舊片.

John Bogle係Vanguard創辦人, 一生力推低成本既指數基金, 2019年1月已經逝世 (已成死老). 呢條舊片係佢2001年在華盛頓DC既國家記者俱樂部 (National Press Club), 以「大跌之後: 股票市場和共同基金的下一步是甚麼？(After the fall: What's next for the stock market and the mutual fund industry?)」為題的一段節錄.

2001年科網泡沫剛剛爆破, 佢一開始直接指出佢一早預期市場會爆破, 但沒有想到這樣快. 這段節錄提出了他認為永恆不變既定律, 有興趣既必須睇片, 但我會寫幾個重點:

1. 「市場回報」(Market Return) 由「投資回報」(Investment Return) 及「投機回報」(Speculative Return) 組成
   *個人註: 如果市場完全沒有投機活動, 投機回報是零, 也代表市場絕對有效, 市場回報 = 投資回報
2. 「投資回報」由企業盈利增長及息率組成, 而「投機回報」是由投機者願意為每一蚊既盈利付出幾多錢.
   *個人註: 投機回報也代表市場情緒, 當市場情緒過份樂觀, 投機者願意以更高既價格買下一蚊既盈利
3. 長期來看, 「市場回報」是由「投資回報」來決定, 例如過去40年 (1961-2001), 企業盈利增長及息率平均是11.2%, 股票市場回報剛好也是11.2%. 但短期來看, 「投機回報」可以是「市場回報」的增長動力.
4. 佢舉例: 1961-1981年, 「投資回報」高達12%, 但市場悲觀氣氛令「投機回報」只有負4.5%, 結果 20年間「市場回報」只有7.5%. 反之由1981-2001年, 「投資回報」只有10%, 市場樂觀氣氛令「投機回報」卻有正5%, 結果後20年的企業盈利能力雖然低於前20年, 「市場回報」卻高達15%.
5. 對P/E既「新演繹」: PE是投機/投資者在當下願意為每1蚊既盈利付出多少錢. 如當P/E是24, 其實是代表投機/投資者願意為每1蚊既盈利付出高達24蚊的價格, 反之當P/E下跌到8, 他們只願意付出8蚊.
6. 佢用「投資的綠洲」(The Oasis of Investment) vs 「投機的蜃景」 (The Mirage of Speculation) 去決定股票市場任何時期既回報.
7. 佢不認為未來10年 (2001-2011)可以維持15%的年回報, 假設未來10年「投資回報」有8%, 「投機回報」必須有7%, 這樣的P/E必須高達47, 佢不相信這是可能的.
   *個人註: 結果S&P 500在2001-2011年只升了38.39%, 平均年回報為3.84%

仲有不少重點我不想寫太長, 但這是真正大師同街坊股神既分別, 世界是不會變的, 當賺錢太容易的時候, 已看穿市場永恆定律既投資者必定會問, 今次真的不一樣嗎? 這個問題如同問人性過去5000年真的有變嗎? 答案是否定的. 我不知股市幾時會大跌, 因為沒有人可以準確預測, 但美股P/E已經高達38, 我只可以講仲沉醉在2020的大牛市的市場參與者, 小心睇路.

#牙痛慘過大病

Something of Value

Oaktree Capital既Howard Marks近來出既memo Something of Value在價值投資者圈中已經廣傳, 對其他大部份既「塘邊鶴」, 如果對價值投資有興趣, 除左只係聽人講重點, 自己應該花D時間睇原文一次.

Howard Marks對於價值投資既觀點對於而家新一代既投資者可能是一種衝擊, 但如果你投資時間夠長, 佢既觀點是refreshing, 但非新觀點, 特別在「解決」近10年「價值」vs「增長」既辯論上, 巴菲特在2001年股東大會已經解答過.

價值同增長是難以區分 (indistinguishable), 增長是價值方程式的一部分 (growth is part of the value equation), 從來沒有所謂既增長股或價值股, 增長通常對價值有正面影響, 但只在當現在投放資本, 以便將來獲得比現在利率更高的現金流既前提下.

反之佢提出一個經典既例子, 就係航空業, 航空業由存在果一刻開始已經未停止過增長, 但這種增長沒有帶來更大既收益, 這是增長為價值帶來壞的影響力.

過去10年主流不停以價值增長之名切割新舊經濟, 其實是沒有任何意義, 所謂「增長股」跑贏「價值股」是基於利率長期接近零, 所有人都將手上既錢投放入股市, 資金追捧所謂既「高息股」到一些有巨大影響力既「科技股」, 大眾不理企業是否賺錢, 只要回報高於零, 及幻想未來資金不會離開股市的前題下, 搬出增長兩字就是潮, 價值就是老土.

可是美好的時光不會永遠維持, 謹慎的投資者只重視企業的價值, 而非增長或股價, 因為當音樂椅停下來的時候, 永遠是價值投資者最快樂的時候.

📈 投資生涯 #13 如何估值股票 (中)：三種真相

我改左個Title, 本來叫估值既藝術, 但覺得太造作, 而家叫三種真相. 今集我地會睇下要估值既一D前設, 同Neil deGrasse Tyson所講既三種真相如何套用在價值投資上.

All-in

Source: 【台積電股價】 台男300萬買樓基金all in台積電 老婆崩潰7日後賺夠裝修錢

係咪成日睇到有人All-in後「改寫命運」？我身邊都成日有人All-in改寫左命運，不過係輸到改寫命運。明天新片，如何估值股票 (中)：估值的藝術

#allin8號仔

#allinHSBC

#allinBitcoin不過大跌8成後走左

#仲有allin螞蟻

財政乘數理論

Source: 兩工會促額外寬免公務員薪俸稅 稱可「振軍心助經濟」 稅務專家批理據薄弱

近日有政府工會用「財政乘數理論」提議單為公務員提供額外薪俸稅寬免, 匪夷所思到連建制精英都頂唔順. 當然在市井謾罵既香港拋D理論出來, 比D唔識既人睇以增加「理據」搏下, 搏到有著數, 搏唔到又冇損失, 背後邏輯就好似警察拉左人先, 告得入可拎credit, 告唔入又冇損失一樣.

投資者不需理會經濟理論去賺錢, 卻可以理解經濟理論去了解世界. 「財政乘數理論」(Fiscal Multiplier) 是由知名既經濟學者凱恩斯(Keynes)既學生卡恩 (Richard Kahn)提出.

近100年有兩個最大既經濟學派, 一個是凱恩斯派, 由佢本人領軍, 一個是奧地利派, 領軍者係海耶克 (Hayek), 兩者就好似民主同共和, 周瑜同諸葛亮一樣, 是一種永恆既較量. 在經濟衰退下, 凱恩斯主張印銀紙增加消費刺激經濟, 而海耶克主張這種假象是自欺欺人, 自由市場既無形之手長期會自我修正, 痛苦是一定的, 政府既干預只會製造更多問題, 之後就出現凱恩斯最出名既一句: 「長期來看我地都係會死 (In long run we are all dead)」

海耶克既理論是正確而且合理, 可是盡可能避免所有痛苦既人性, 令美國政府大多數以凱恩斯派為政策背書, 說到底就算長期健康, 總統都唔再係我, 但如果我而家幫大家先止痛, 之後有咩事已經唔係我既問題.

可是就算未計凱恩斯定海耶克好. 政府工會用「財政乘數理論」既理據都同凱恩斯派既原意不同, 所以真正既笑話就係當一班人好認真地拎一D佢地都唔係好明既野出來為自己爭取一D唔應得既利益, 呢個比直接講笑話更好笑, 因為可以笑兩次.

投資大市

太多人問, 所以我一次寫晒: 買恆指基金其實就是買大市, 恆生指數過去30年以平均每年10%上升, 由1986年的2500點升到今年25000點, 如果你過去30年投資大市, 甚麼都不做, 今天就整整升了10倍, 但為何現實9成人還是輸錢?

現實很多人以為是每年加10%, 其實30年來上落不下數十次, 87年股災, 97年金融風暴, 00年科網股, 03年SARS, 08年金融海潚, 11年歐債危機, 每次都令股市下跌20-70%, 但時間一長, 大市還是不停創新高, 這是因為股市短期受很多因素影響, 但長期是經濟的成果.

恆生指數無法回到30年前的2500點, 就如街上的魚蛋每法回到30年2蚊串, 樓市無法回到30年前1000一尺的道理一樣. 但投資者在下跌時過份擔心而賣出股份, 或將MPF轉去「保守」的基金, 而不是無視短期的不利因素, 正正就是輸錢的原因. 除非你在未來1-2年內退休準備提款, 一個投資大市的人是不需做甚麼事, 因為恆指最終都是會向上到3萬, 4萬, 甚至5萬點, 如果你還有30年才退休, 最好的方法是合上雙眼, 好好享受經濟成果.

而理財也是極簡單的事, 不需聽甚麼「名人」或推銷員過份複雜的道理, 只要你擁有小學程度的能力而持之而行, 你的退休生活不會差, 甚至比很多所謂的「專業人士」更好.

1. 收入一定比支出高

2. 錢分三份, 

一份投資大市 (強積金或盈富基金), 

一份做傳統的儲蓄/ 人壽保險 (保險公司或銀行的回報需然比較低, 但這樣你在大市下跌時不會睡不著而做出愚蠢行為)

最後一份是現金或外匯 (不好聽那些推銷員說甚麼錢放在銀行就貶值, 必須有些流動資產, 因為你永遠不會知有甚麼時候需要用錢, 如果需要用時大市表現不好, 或傳統儲蓄未到期, 你就被迫要賤賣資產)

3. 不好去預測市場 (人是無法預測未來的, 今日華爾街多少聰明人, 大公司花數以億計美金去嘗試預測股市, 結果不會比你同我擲骰子優勝)

做到這3樣事, 生活不會差, 但老實說雖然簡單, 但做到的只有極小數

股票小技巧： 如何在市場立於不敗之地

今日想講講一個實用小技巧.

一般人買賣股票都係輸多贏少，其實大部份不是智力問題，而係心理問題.

當然大家都知要「低買高賣」，但現實卻變左「高買低賣」。主要是因為心理壓力，跌既時候不願忍痛割愛, 升既時候卻過份興奮。

跌既時候, 很多人不理會，只希望佢會有日升返上來，現實只有兩個結果，一個是愈跌愈低，最後拋埋一邊唔理，不願面對失敗，令一個結果是最終反敗為勝，但不知要過多久，有些股票可能要5年, 10年, 甚至20年才反回投資者的買入價，真的是個人理財的「大蕭條」. (註一)

更可惜的是，如有幸回升投資者的買入價，證明該公司盈利已經大有改善，再上的可能性十分高，但投資者對多年沒有表現深深不憤，只要回升買入價，就立即拋售，一點賺頭也沒有，就高呼好彩走得快，然後說股票都是騙人的，最後看著該股進入新的高位。

所以我不需多說股票下跌時應該如何。

今次我想說如果升應該如何。

可能因為大部份人已經習慣投資輸錢，所以有日一隻股票竟然開始賺錢，　就會變得十分緊張，好像下一秒那些利潤就會不見了．貪婪與恐懼　（Greed and Fear)　一直都是股市的幕後推手，投資者如果絕對理智，沒有貪婪與恐懼，就不會輕易作出愚蠢決定。可是聖人沒幾個，有都可以錯，所以必須有些克制自己的機制，才可以令自己在市場立於不敗之地。

上圖是佳明集團控股 (HKG: 1271)　今年８月上市以來的圖．佳明集團是的建築承建商，為主承建商為本地大型物業發展商提供住宅物業發展項目的樓宇建造服務，因為成本上升，所以他們很聰明地轉型為高利潤的數據中心租賃業務．這種「沉悶」的公司，永遠都不會得到主流重視，沒有財經新聞會提到他，　沒有股票經紀會推薦他，大家都喜歡走去看匯豐，中銀，中國人壽，google, Apple, 這些大藍籌股, 可能他們的故事比較有趣，但他們的股價才是真正的沉悶。

佳明在２０１３年８月上市，在＄０．８到＄１左右上落，當我得知他們真正的業務是高利潤的數據中心，　我在９月３０日開始買入，投資１萬６左右。

你在上 圖可看到他在１０月開始升。
問題來了，　如果你的萬６元升了５％，　多了＄８００，你的腦子在想甚麼？
１．　嘩！＄８００，　走人！
２．　嘩！＄８００，　太少，　拿來幹嗎？

如果你選一走了，就不用看下去。
如果你選二，　結果之後在一個星期升到＄２一股，５０％！你的腦子在想甚麼？

１．嘩！５０％，賺＄８０００，這世從來未試過一星期賺８千，即走！
２．嘩！５０％，很亂，唔知點好．
３．嘩！５０％，唔理．

如果你現在選一，也可以不用看下去．
如果你現在選二或三，無論你如何決定，我也可以肯定你的心理一定承受某種壓力．這和股票升了多少沒有太大關係，而是跟你內心的貪婪與恐懼有關．

２． 很亂，唔知點好．是因為恐懼，害怕失去．
３．唔理．是因為貪婪，以前一年１０％都覺得很不錯，現在一個星期５０％，覺得更多是應該的．

我的技巧就是對付這種人性的弱點.

為甚麼我通常買最少三手？是因為想比自己三次機會．

在這個例子，１萬６的投資額，升了５０％就變成２萬４，你應該先放走一手（三份一），不是因為你估佢會回落或繼續升，而是因為回收資本會減輕你的心理壓力．

賣走三份一，你就可以拿回８千，是你投資額的一半，這樣就算跌，你也肯定不會輸太多，如果升，比你放走全部股票，也不會太傷心。

結果這隻股票繼續升，已經多５０％，升到了１００％．你「剩下的」＄１６，０００，又變回＄２４，０００．但跟上次２萬４不同，上次的２萬４是由１萬６的投資額變成的，但今次卻是由８千變成！

你於是又放走一手，這樣你一共收到＄２萬（上次８千跟今次１萬２千），已經比你原先投資的＄１６，０００多了＄４０００．但你剩下的一手股票還值＄１２，０００．

重要的不再是剩下的一手股票值多少，而是你擁有的安全感．因為你原本萬６元的投資額已經安全，而且已經確定多賺了＄４０００，剩下的一手股票是免費的，無論他跌到零，或再升１０倍，你的心情已經不會再受影響．

在我自己的實際操作．
我在９月３０日以平均＄１．３４一共買入了三手（一手４０００股），花了＄１６，０８０
在１１月２１日，＄２．１放了一手，回收了＄８，４００
在今日１２月３日，＄３．１又放了一手，回收了＄１２，４００

花了＄１６，０８０，共收了＄２０，８００，實現利潤＄４，７２０

剩下的一手４０００股，現值＄１２，０００多，但我當是多得的，免費的，無論佢跌到＄０，或升到１２萬，我都絕對安寢無憂．

這就是我想分享的其中一個股票小技巧．

(註一：　經濟大蕭條（Great Depression），是指１９２９年至１９３３年之間由美國引起的全球性的經濟大衰退。美國股市要２５年才可從１９２９年華爾街股災恢復．）